Lo parlar                                                                                  

Lo parlar es tant fòrt que lo manjar,lo dormir e lo beurre.

Una vièlha tanta me disià sovent :

« Te càl venir me veire, parlarem. »

Ma maire anava « parlar ambe la vesina »

e papeta anava faire cada jorn un « torn de plàça »

per « parlar ambe los autres,per saupre las novèlas dal vilatge ».

Lo dissabte anava al cafè qu’es un polit parlador.                                                                                                        

Los òmes son faits per parlar e ne profitan.

Los pichòts parlan avans de marchar.

Perdéqué parlan ? i a un molon de rasons.

Parlan per dire que sèm aqui,qu’existan,que càl nos escotar,

per faire calhar los autres o i dire çò que devan faire.

Las discutidas sul temps, las malautiàs qu’avem o las qu’avem paur d’aveire,

los consèlhs, los vejaires, dire çò que los autres amagan

fan una occupacion jornadièra.

Las paraulas son agras, patufèlas o aimables, doças, alisairas.

Te fan de ben o te fan de mal.                                                                                                                                                

Se pòt parlar per faire de confidéncias,

per dire a un çò que gausas pas dire a l’autre,

per dire un secrèt o una colhonada.

N’i a que fan de discors,d’autres que contan d’istòrias

per faire rire o per faire plorar.

D’unis son bocafinas, savan adobar las causas,

bargalhan, favelan, que sabes pas mai ont ne sòs.

D’autres an de mal per levar lenga,son pas parlaires,

tresparlan sovent, an pas la tracha longa.

Papeta aimava los que parlan plan,

dison de causas que n’i avem pas jamai pensat

e t’entortobilhan tot aquò que metes de temps a va desnosar.

As pas lo temps de pausar la question que t’an dejà balhat la responsa .

I parlan d’alh e nos respondon cebas.

Comprenem pas totjorn çò que disan,

en politica, en filòsofia, a l’escòla, per travalhar la vinha o per faire lo vin bon.

Complicon tot çò qu’i passa per la boca.                                                                                                                     

« Me faretz plaser se me parlas d’aquò.

Vòli pas ne parlar, es tròp penós. »

N’i a que parlan ambe los uèlhs,

las femnas quand son amorosas.

Quand parli de vos parli de ièu,

quand parli de ièu, parli de tu.

Sens faire de filòsofia podem dire que :

- lo parlar e la pensada son de cotria

- lo parlar es una aisina e una via de comunicacion

- se pòt jogar ambe los mòts.

- lo parlar es escur, ambigú, precis, clar per ajudar o enganar los autres.                                                                    

Cadun a sa parladura, la dal vilatge, de la familha, de l’escòla…

que dis d’ont venon.

Urosòment que n’i a encara que parlan patoès.                                                                                                                                                                                                                     

Jaume Carbonèl

març de 2014