Una jornada a la vigna                                                    

Pendent los congèts de Nadal

m'arrivava d'anar veire los grands.

"Deman vau a las Molièras me diguèt papeta,

se volès venir partissi a sept oras e miejà.

Caldra pessar a sièix oras.

Prendrem la saqueta perdéqué es trop lenc

per tornar manjar aici."

Lo lendeman èrem sèitats sus la carreta,plan vestits,

papeta portava la manrega e ièu la canadièna.

Fasià nuèit,disièm pas rès.

Papata podià demorar atal,una ora sens dire pas rès.

Era d'aquèles omes que travalhan sols

gaireben tota l'annada.

Son pas parlaires.                                                                                                                                                             

Lo pas dal chaval sus la rota marquava lo temps,

donava lo ritme de la jornada,

era lo metronoma.

E aquèl ritme lo gardavem per totas las accions,

quand travalhavem e quand nos pausavem.

Ieu m'annava plan.

Lo perdèri quand mèmes dins ma vida professionala.

Pensi qu'ès pas un veritable progrès de corre dal matin al sèr.                                                                                 

Quand arrivèrem a la vigna fasià frech mas i avià lo solelh e pas de vent.

Bel temps per los que travalhan defora.

"Vau laurar al costat dal rèc,

que i a d'erbas que son dejà nautas,diguèt papeta.

As qu'a anar podar ço que demora a la punta,

n'i a un centenat de pès.

Te cal pas daissar trop de cops,la terra es pas famosa."

Al cap d'un parèl d'oras lo vegèri arrivar.

" Vai-t'en laurar,vau fenir de podar.

Un travalh te deu pausar d'un autre."

Praticava lo repaus actiu como los esportius.

Coneissià pas l'aparesiment.                                                                                                                                         

Lo Gamin,un entièr tot blanc,que devià esser patacat quand era jove,

avià al mens quinze ans.

Era fort como un buou e laurava sens pena.

Me regalèri de laurar,

de sentir la tira dal chaval dins lo margue de l'alaire,

de daissar las regas plan propras.

Me semblava que las socas va sentissian,qu'èran contentas.

Dinnèrem assetats dins lo rèc,sus l'erba seca,

apiejats al toral.

Avièm fait un pichot fioc per faire caufar las monjetas

qu'avièm trapadas dins lo panièr covert d'un toalhon

que nos avià aprestat mameta.

"Aniras querrer d'aiga per faire beure lo chaval,

as un farat ambe una corda dins la panièra jos la carreta,

i a un potz a n'aquèl ostal,darrièr las carabenas.

Desatèla-lo e enlèva s'i lo colar,

atal sera pas geinat per manjar e se pausara milhor."

Papeta me parlèt de la difficultat de viure

quand lo vin se vend pas,

de la possibilitat d'anar a la coperativa,

dals politicaires que fan pas pron attencion a los que travalhan,

èlis que fan pas rès de tota la jornada.                                                                                                                         

Al tantost me demandèt de netejar lo rèc que fasià lo torn de la vigna.

"I podès mettre lo fioc,contra lo vent."

Aquo m'agradava.Aquèl fum sentissià bon.

Quand tornèrem lo sèr,a cinq oras,contents totis dos d'aquelà jornada

se metèt a parlar como se era sol:

"Veses,aquo es ma vida,cada jorn.

Me cal pas esser malaut.

Urosoment que lo travalh es variat,

que cada sason te far commençar de causas novèlas.

Lo pus important es de travalhar per tu.

Quand èri jove ei travalhat per un patron.Es dur.

L'ome es pas fait per travalhar per un patron...

Va demandaras a ton paire qu'ès regissor."                                                                                                                  

Aquèlas jornadas passadas cap a cap ambe papeta o mameta,

a la vigna,al travalh,l'estiu,l'ivern,dal matin al sèr,

sosquèran una granda partida de mon educacion,

de ma formacion a la vida e de ma filosofià.

Pensi que m'en demora encara quicom,

que me soi bastit sus aquèl fondament

de l'acceptacion paisana de las causas naturalas.

Cal faire dal milhor ambe ço qu'as.

Malgrat mon estacament a n'aquèlas vignas,a n'aquèla vida,

partiguèri a dètz-e-sept ans a l'Escola normala per estre institutor.                     

Un autre mestier.                                                                                                                                                                  

Jaume Carbonèl

                                                                                                                                                    novembre 2010                                                                                                                                                                                          

alaire, araire : charrue simple

aperesiment : action de rendre ou de devenir paresseux

peresa : paresse - peresos : paresseux

pessar : donner à manger aux animaux

pensar : soigner, choyer, donner à manger aux bètes

saqueta : petit sac, repas à emporter

patacat : pommelé

toalhon : torchon

manrega : houppelande avec capuche en grosse toile