Lo fuòc                                                                                 

N’avem passat d’oras davans lo fuoc,

lo matin, lo soèr, en ivern,en estiu,

per se caufar, faire la cosina,

grasilhar las castanhas o un bocin de saucissa,

una costèla d’agnèl o una entrecosta.

E de cops quand plovià e que fasià michant,

qu’èrem sols sens saupre de qué faire,

qu’èrem trist, que la taina nos roganhava,

qu’èrem lasses, qu’esperavemm lo solehl,

que nos èrem disputats,

que los pichons èran malauts,

que lo chaval se levava pas

o que podièm pas vendre lo vin,

demoravem aqui,a fintar las flambuscas,

a nos caufar las mans, los uèlhs un pauc bagnats.                                                                                                           

Ara ai una chiminièra e l’aluqui sovent,

tre que fa un pauc frèsc,lo sèr quand plou

o lo matin quand torra.

I demori sovent per veire se pren plan,

per veire cossi lo boès s’abranda.                                                                                                                                    

Pensi totjorn a tu dins aquèles moments,

a tot ço qu’avem fait ensemble,

aqui ont sèm anats quand èrem joves,

aqui ont sèm tornats quand èrem vielhs.

Me ven lo milhor barejat al pus michant

dins un endreiçament qu’ès pas totjorn lo mèmes,

un film que passa tot sol

e que vesi cada cop como una descobèrta.

Aimi aquèles moments e los crenti,

pèl mal que me portan,

pèl ben que l’escafa.                                                                                                                                                         

Pensi tabès als pichons,a la familha.

Fau lo torn,ont son, que fan ?

Es como se me montravas de fotos.

E lo temps passa,trastoleja entre uèi e deman,

entre uèi e ièr,sens jamai s’arrestar.

M’en avisi quand soi davant la chiminièra alucada.

Beleu qu’ès lo fuoc que nos fa pensar a tot aquo,

que nos abeluga.                                                                                                                                                               

E aqui,davant lo fuoc que veni d’entusar,m’arriva un sovenir :

Un jorn èrem assetats sus la carreta,

en davalan de La bada,

discutavem e demandèri a Papeta

ço qu’èra lo temps per èl.

Se metèt a soscar un moment

e parlèt d’a passet sens me fintar,

como s’èra sol :

« Lo temps ès quand plou o quand fa bèl.

Lo temps ès como t’adovas ambe ièr e deman.

Lo temps passa e torna pas e lo podès pas arrestar.

Podès pas estre mai fort que lo temps.

Nostre sejorn sur terra ès precari,

e de cops as temps e de cops as pas temps de fenir lo prétzfait. la tàche

Al tavalh cal pas estre pressat e cal pas languir. »

E n’i a que disan que podes pas faire de filosofià

s’as pas lo vocabulari mannat.                                                                                                                                         

Jaume Carbonèl

                                                                                                                                                       Octobre 2011                                                                                                                                                          

- torrar, gelar : geler

- lenha : disian lo boès

- soscar, perpensar : réfléchir

- s’abrandar : s’enflammer

- tre que : dès que 

- mannat : adequat

- flambuscas, flamas, flambas, flamarotas : flammes

- trastolejar : aller et venir

- roganhar, rosegar : ronger

-d’a passet, doçament, dapasset : lentement

- escafar : effacer

- abelugar : éveiller, exciter, animer

- endreiçament, arrangament, asegatge : ordre