Amors desnosats

Cada còp que parlan d’amor parlan de la debuta,

de la rescontre, dals moments los pus agradables,

quand culhisses la fraga

e jamai de la fin,de la copadura,de la rompedura.

Es pr’aquò un moment malaisit,

es una michanta passa.

Quant de còps se cal separar dins una vida ?

Lo prumièr còp es ambe la Peireta.

Erem ensemble dempèi dos o tres ans,de 15 a 18,

dansavem,nos promenavem al bord dal canal,l’estiu,lo soèr,

nos balhavem de rendètz-vos.

Nos amagavem mas tot lo monde va savian

que nos fasièm ensemble.

Nos potonejavem,la tocavi un pauc

mas volià pas anar mai lenc.

Aquò m’agradava e me sufisià.

La trapavi polida e era polida.

Quand anguèri a l’Escòla normala,era lenc,

la vesiài per las vacanças

e un jorn i diguèri qu’èra fenit.

Me virèt l’esquina,s’alonguèt sus la parabanda

qu’èra encara cauda e fintava lo cèl.

La daissèri atal e partiguèri,pas trop fièr.

Quand i pensi,encara,me fa quicòm.

Lo second còp èra ambe la Pauleta,

una rossa qu’anavi veire cada dimenge ambe lo tren

e l’enncontravi cada estiú a Valras o a Sèta.

D’aquèlas femnas que doblidas pas jamai.

Sentissià lo campestre e la bona santat,

lo pèl lonc,la pèl fina,lo sorire embelinat

e las ancas plan faitas.

Quand fringavem aviem paur de faire un pitchon

e aquò,a l’epòca,era jaurèl.

Partiguèri a Paris e nos arrestèrem de nos veire

e de nos escriure.

M’an dit que s’èra pas jamai maridada.

Lo pus de grèu es quand partissan sens rès dire

e que te daissan tot sol,

e que sabès pas perdéqué son partidas .

M’arrivèt ambe la Marieta qu’èra la femna

la pus alucaire,la pus aferonada qu’ei conegut .

Me diguèt un jorn : »N’ai pron de tu,me tòques pas mai. »

Me semblava que tombavi dins un gorgàs sens cridar

e que mon còr s’arrestava.

Me cal dire tamben que divorcèri a 40 ans…

e que me maridèri dos còps ambe la Manon.

Quand se desnosa l’amor

perdès sul còp la mitat de tas fòrças.

La separacion,que ne parlan pas sovent,

es totjorn dificila,magenca la vida,

mèmes se te n’avisas pas.

Sabi pas s’i a una deontòlogia de l’amor.

Jaume Carbonèl

Mai de 2013

- rompedura, ruptura 

- fraga : fraise, le meilleur de la chose 

- parabanda : parapet

- emmbelinat : enjoleur 

- jaurèl : agaçant

- de grèu, grèu : pénible 

- alucaire : qui excite

- aferonada : excitante 

- gorgàs : grand gouffre

- magenca, amputa 

- fringar : faire l’amour